‌حه‌فته‌یه‌ك پێش ئه‌وه‌ی جه‌ماڵ شه‌هید بێ، جه‌نگه‌ی گه‌رمای نیوه‌رۆی هاوینێكی گه‌رم، مانگی پووشپه‌ڕ، له‌ باغی میراوای قه‌راخ بۆكان له‌ژێرسێبه‌ری دارێك دانیشتبووین و باسی خۆشه‌ویستترین ڕه‌فیقی له‌ده‌ستچوومان ”سوله‌یمانی بلـووری” یمان ده‌كرد و بۆی ده‌گریاین. چوار پێنج مانگ بوو لێك هه‌ڵبڕابووین و یه‌كترمان نه‌دیبوو. پشتێنده‌ ژۆژێته‌ قاوه‌ییه‌كه‌ی سوله‌یمانی له‌ پشت دا بوو، جارجارلكێكی پشتێنده‌كه‌ی ده‌ردێنا و فرمێسكه‌كانی پێ ده‌سڕێه‌وه‌. پاش ئه‌ژده‌هاكی ماموستا گۆران دیسان تێی هه‌ڵكرده‌وه‌. ”وه‌ی له‌ زاڵم نه‌ مێنێ ...” به‌ڵام كوڵی گریان نه‌یهێشت ته‌واوی بكاو ئه‌وجار بۆخچه‌ی دڵی پڕله‌ خه‌می بۆ كردمه‌وه‌ و بۆی هه‌ڵڕشتم و ده‌ستی پێكرد:

خۆم بۆ ساغ نه‌ده‌بۆوه‌، بڕۆم وه‌دوای ده‌رس و هونه‌ركه‌وم یان چه‌ك هه‌ڵگرم و ببمه‌ پێشمه‌رگه‌ . به‌ڵام ئاخری بڕیارم دا، بڕوم و ڕێگای یه‌كه‌م هه‌ڵبژێرم باشتره‌. هه‌رچی هه‌مبوو له‌ شریت و ئاڵبۆم و كتێب و شێعرو ئاهه‌نگی تازه‌ كه‌ماوه‌یه‌كی زوركارم له‌سه‌ركردبوون، له‌ توێی دوو جانتام ئاخنی و چووم بۆ تاران, پاسپۆرتم هه‌بوو . ڤیزای سۆئێدێم وه‌رگرتو و بڵیتی ته‌یاره‌م كڕی و قه‌رار وابوو بۆ سبه‌ینه‌كه‌ی هه‌ڵفڕم وبڕۆم به‌ڵام به‌داخه‌وه‌ هه‌رئه‌و ڕۆژه‌ هه‌واڵی هێرش بۆ سه‌ركوردستانم بیست و دڵم به‌رایی نه‌دا. قه‌ڵه‌می ده‌ست و پێم شكا هه‌رچی كردم نه‌متوانی خۆم قانع بكه‌م كه ‌خه‌ڵكه‌كه‌م به‌جێ بهێڵم و بڕۆم . ئاخر من كوڕی ئه‌و خه‌ڵكه‌م و بۆ ئه‌و خه‌ڵكه‌ ده‌ژیم و بۆ ئه‌و خه‌ڵكه‌ گورانی ده‌ڵێم . هونه‌ری چی ئه‌گه‌رله‌ نێو خه‌ڵك و خاك و نیشتیمانی خۆم دانه‌ بم؟ بۆیه‌ جانتا و مانتام به‌جێ هێشتوهه‌ر بۆ سبه‌ینێ ڕا به‌ لای ورمێ دا خۆم گه‌یانده‌وه‌ سێڕێیانی نه‌غه‌ده‌ و به‌لای خانه‌گێ و ئیندرقاش و ئه‌وه‌ دا هاتمه‌ وه‌ نێو پێشمه‌رگه‌كان و چه‌كم هه‌ڵگرت و بوومه‌ پێشمه‌رگه‌. به‌ڵام له‌ ناو كۆمه‌ڵه‌دا چه‌ند كه‌سێك هه‌ن زۆرم عه‌زێت ده‌كه‌ن. من لام وایه‌ هه‌ركه‌س ده‌بێ كاری خۆی بدرێتێ. ماوه‌یه‌ك له‌ لایه‌ن یه‌كێتی مامۆستایانی بۆكانه‌و ه‌كلاسی سروود وگۆرانی و هونه‌رم بۆمنداڵان دانابوو و ده‌رسم ده‌گووت. ئه‌وه‌ش كاره‌ و ئه‌وه‌ش خزمه‌ته‌، خۆشه‌رت نیه‌ هه‌موو كه‌س چه‌ك هه‌ڵگرێ . سوله‌یمان فه‌وقی دیپڵۆمی ئازمایشگاهی هه‌بوو، بۆ خۆی نیمچه‌ دوكتوورێك بوو. بۆ ده‌بێ چه‌كی بده‌نێ و بینێرنه‌ شه‌ڕ؟ به‌شه‌ڕه‌ف ئه‌من له‌ شه‌ڕناترسێم و ئه‌وه‌ش سابیت ده‌كه‌م. ئێستاش ئه‌وه ‌ده‌سه‌ریان كردووم بچمه‌وه‌ ناوچه‌، جا نازانم چم لێ ده‌كه‌نوو بۆ كوێم به‌ڕێ ده‌كه‌ن؟

ئه‌ورۆژه‌ هه‌تا ئێواره‌یه‌كی دره‌نگ، هه‌تا ئه‌وكاته‌ی ڕه‌شایی به‌ری ئاسمانی گرت له‌و باغه‌‌ دانیشتین و پاشان ورده‌ ورده‌ به‌ره‌و شاربووینه‌وه‌ . ئه‌من ده‌بوایه‌ بۆ سبه‌ینه‌كه‌ی بگه‌رێمه‌وه‌ ناوچه‌ی سه‌رده‌شت جه‌ماڵم به‌ جێهێشت.جه‌ماڵ به‌دڵێكی پڕله‌ خه‌م رۆیشت و به‌داخه‌وه‌ ئه‌وه‌ ئاخرین دیدارمان بوو...